نصائح للشباب على النت
البنات و الولاد أغلبهم في سن المراهقة للأسف أمر ﻻحظته على النت في المنتديات قديما وأراه يتكرر على الفيسبوك بينهم
التعلق وتبادل الحوار في حدود يرون أنها ليست فيها ما يخالف لكنها بالفعل مخالفة فه خلوة على اﻻنترنت يزينها الشيطان و يطوفون بكلمة الحب من بعيد ، الطرفان يتعلقان بالنموذج الذهني المثالي للشخص الآخر وهو الكمال بلا عيوب ويكملون في خيالهم الصفات الأخرى الجسدية والسلوكة وتركب الصورة الذهنية مع الحوار ( أحلام يقظة ) ويظنون أنه الحب ، طبعا هذه فتنة وليست حباً أبداً كيف تحب شخصاً ﻻ تعرف شكله وﻻ ماضيه وﻻ ظروف حياته ولم تتفاعل معه وجهاً لوجه ماذا لو التقيت بها و وجدتها تتحدث بطريقة أنت تكرهها ؟ ونظرات عينيها ﻻ تريحك؟ماذا لو التقيت به ووجدتيه بملامح ﻻ تعجبك وكرهتيه؟ نظرته للحياة ، أسلوبه ، طريقة تفكيره ، مثله العليا ، مبادئه ، فلسفته للحياة ، نظرته للمستقبل ، رؤيته لشريكة الحياة ، أمنياته ، طموحاته ، مواصفات فتاة أحلامه ، ماذا لو اكتشفتما أن الفاترينة الحلوة التي تعرض الجانب الحلو فقط تخفي خلفها عيوبا كثيرة. ( ما تكدبوش على نفسكم دي فتنة )
حرام عليك بنات الناس...حرام تعلقها بيك وتعشمها ، حرام تتحكم فيها من بعيد علشان إنت أكبر وسنها وخبرتها صغيرة و إنت ما تقدرش تخطبها دلوقت ! قلبها ليه تجرح فيه وتخربش فيه !
حرام عليك انتي كمان تعلقي شاب بيكي وتقولي له مستنياك سنين و أول ما ييجي لك عريس جاهز تفضلي تسألي يمين وشمال وتقولي أعمل إيه وفي الآخر تتخطبي وهو يتجرح..ويتصدم .
حرام والدك اللي قاعد ومطمئن إنك في البيت ومحفوظة وفي أمان و إنت فاتحة الإنترنت وبتوعدي شاب تاني ما تعرفيهوش انك حا تتجوزيه لو...((((لو)))) جه يخطبك .
على فكرة مس معنى إنه حاطط صورة إسلامية يبقى شيخ ما كلنا بنحط صور إسلامية .
على فكرة ممكن تكون بتكلم واحد تاني غيرك .
على فكرة مش علشان بتقولوا في آخر الرسالة ﻻ إله إﻻ الله يبقى اللي قبلها مسموح تقولوه.
الحب زي الهرم له قاعده عريضة ويحتاج بناء فعلي من طرفين وممكن سنين في الحلال أما حالة السجن العاطفي وإن الشخص ( يستحلي ) الحالة اللي هو فيها تشبه الشلل وبتفضلوا مكانكم مستسلمين وتكلموا بعض أحيانا خلف ستار مختلف بيحسسكم إنكم مش غلط ( نقاش ديني،سياسي،عمل خيري،إشراف على منتدى،إشراف على صفحة فيسبوك ) الحل ببساطة أغلق باب الفتنة بلوك للطرف الآخر توقف عن تتبع أخباره وما تدخلش تشوفه بيعمل إيه ﻻ تبادله الرسائل أبدا اتق الله في نفسك وقلبك...قلبك أمانة ما تفضلش تخربش فيه و قلب الطرف التاني برده أمانة وراقبوا الله في أفعالكم بنات الناس مش لعبة وقلوب الشباب كمان مش لعبة
استعففوا
رسالة للأمهات خدي بالك من بنتك وصاحبيها ...
وللأخت الكبيرة قربي من أختك .
مروة القسط
البنات عملت كل ده و زيادة شوية بعد الجواز
أنا اللي بآكل مع وﻻدي من كيس الشيبسي ^-^
أنا اللي بأجيب لنفسي شوكوﻻته معاهم وآيس كريم كمان^^
وأنا اللي بآخد العيدية بتاعتهم في العيد واصرفها
وأنا اللي كملت الواجب بعد ما إبني نام وقلدت خطه وعملته مكسر
علشان المدرسة ما تاخدش بالها
(استغفر الله العظيم سامحني يا رب) ^-^
وأنا اللي كنت وهم صغيرين بأتفرج معاهم على الكارتون
(كنت بأشوف البوكيمون وأبطال الديجيتال وبأغني التتر معاهم)
وأنا اللي كنت بألعب ماريو بعد ما ينامو ووصلت ليفيل حلو
(وصلت لحد التنين وحررت الأميرة .
وأنا اللي ضربت إبني على إيده وبعد ما نام عيطت
وضميري أنبني وقعدت أبوس فيه وقلت مش حا أعمل كده تاني .
وأنا اللي باتسحب وأقص ضوافره وهو نايم.
وأنا اللي أول ما إتجوزت حرقت الأكل.
و ما كنتش بأعرف أعمل القلقاس واتصلت بمامتي واتعلمت.
وأنا اللي نسيت براد الشاي على النار واتحرق ..
وأنا اللي جوزي جابلي براد بيصفر بعد ما حرقت كذا براد
واشترى لي تايمر علشان يرن بعد 5دقايق
وأخيرا قررت استخدم الغلاية( أأمن)
وأنا اللي أول ما اتجوزت كنت بأكسر الكبايات وأنا باغسل المواعين
و جوزي ساعتها بقى يشترى كل شوية 6 كوبيات شبه بعض
ويقول لي علشان تكسري براحتك♥
وأنا اللي حطيت لبس بيطلع لون مع لبس زوجي وبوظته
وأنا اللي كبيت الشاي على اللاب توب الجديد بتاع زوجي وأنا
بأقدمهوله
وأنا اللي حرقت المكنسة الكهربائية
وأنا اللي عملت تورتة بايظة
وفضلت آكل منها لوحدي وما كانتش بتخلص . (من حلاوتها طبعا)
وأنا اللي مش باحب حد يشوفني وأنا بآكل المانجو
(ولا البطيخ)
إنتي عملتي إيه قولي متخبيش؟
كيف تسعد زوجتك
ابتسم و أنت تفتح باب البيت فشكلك أجمل و أنت مبتسم
( اعمل نفسك متفاجيء بالعيال و حاول تكون مبهج .. هي أصلاً كانت هتعجنهم ، و انت لحقتهم )
قل لها (وحشتيني) (إيه الشياكة دي)
(ما تدققش لو لسة ﻻبسة نفس الفستان بتاع أول امبارح .. قول وخلاص وهي هتفهم وتلبس واحد
جديد
لو في يوم حرقت صينية البطاطس .. خليك ستر و غطا عليها .... و ما تقولش لأختك و مامتك !! ..
و افتكر لها طاجن البامية اللذيذ بتاع السنة اللي فاتت و سامحها .. ما كلنا حرقنا البطاطس
لو لقيت تراب على السفرة هات فوطة و لمّع قدامها عشان تكسفها ..
( ق..قصدي ارسم عليه قلب و سهم و أول حرف من اسمك و اسمها و سيب التراب ) و هي بعد كده
هتاخد بالها
إديها مصروف .. أيوه .. مصروف تجيب بيه اللي نفسها فيه .. و خصوصاً لو مش بتشتغل ..
المصروف بيفرّح أوي (حتى لو جابت بيه جيلي كوﻻ ما تناقشهاش )
اكتب لها جواب .. ولو مرة كل شهر (حسّن خطك) و حطه في المطبخ عشان تتأكد إنها هتشوفه
أول ما تصحى من النوم ( أصلها بتقوم فوراً من السرير على المطبخ علشان تاكل .. ق...قصدي تطبخ
) .. طبطب عليها زي الأب ما بيطبطب على بنته .. الست غلبانة بتحتاج كده (بس مش و هي بتصرخ
للعيال .. مش وقته .. طبطب عليها بعد ما تقدملك صينية الكنافة و تخلّص شغل البيت و تقعد ترتاح ..
ساعتها بتبقى مهدودة فعلاً )
اشكر فيها قدام مامتك و في نضافتها ( ما تجيبش سيرة التراب اللي على السفرة ) و في أخلاقها و
طبيخها ( انسى صينية البطاطس المحروقة ) و صبرها على العيال ( حاول تنسى صوت صريخها و هي
بتغير لإبنك ) و شياكتها (بغض النظر عن العباية البرتقاني أم كسر )
ما تقارنهاش بحد عشان هي كمان مش تقارنك بحد
مش ﻻزم تحكي عن زميلتك في الشغل الباشمهندسة فوزية و الدكتورة حسنية و تشكر في شخصيتها و
ترغي و هي قاعدة في البيت منقطعة و ضحّت و طالع عينها و في الآخر تشكر في عنايات و هي
قاعدة ( عيب ما يصحش )
الستات بتحب الأخبار (فراغ) سيبها تعيش دور المحقق كونان وجاوب على أسئلتها و احكيلها عن
يومك ...( حاجات يمكن بالنسبة لك بسيطة بس هي لما بتعرفها وتلاقيك بتحكي بتحسسها بالأمان )
خرجها مرة كل أسبوع (بلاش وقت الحظر ﻻحسن يعتقلوها )
أشكر في أهلها (حتى لو مش بتحبهم .. دور فيهم على أي حاجة حلوة )
هاتلها ورد (بلاش دباديب .. دول للمخطوبين بس )
هاتلها شوكوﻻته ( حلوة الماندولين )
إديها عيدية في العيد
افتكر أيام الخطوبة
لما تتعب و تسخن .. ارقيها .. و ادعيلها .. و اعمل لها ينسون .. و اظهر شوية تعاطف ( حاول تخبي
فرحتك )
لو خارجين و اشتريتوا حاجة .. ما تشيّلهاش كل الكياس .. كفايه عليها كيس
بالله عليك .. هي أسيرة عندك .. يعني كأنها عصفورة محبوسة في قفص و كانت فرحانة بيك و
عشمها فيك كبير ف ماتخيبش ظنها و حطها في عينيك و اتقِ الله .
